Shpërthim në lokalin e deputetit serb në Ranillug

LAJMEKOSOVE

8/7/20231 min read

Një mjet shpërthyes dyshohet të ketë shpërthyer të shtunën mbrëma në një lokal në Ranillug.

Lokali dyshohet të jetë pronë e deputetit të Listës Serbe, Zoran Maksimoviq.

Zëdhënësi i Policisë së Kosovës për Rajonin e Gjilanit, Ismet Hashani konfirmoi për Telegrafin se rasti ka ndodhur rreth orës 22:45, ndërsa nuk raportohet për persona të lënduar.

“Më datën 06.08.2023 rreth orës 14:15 Stacioni i Policisë Ranillug ka pranuar informacion se tek lokali i quajtur ,,Kod Maksi” pronë e Z.M. (mashkull, kosovar serb) dyshohej se ka shpërthyer një mjet shpërthyes. Rasti dyshohet të këtë ndodhur më datë: 05.08.2023 rreth orës 22:45. Njësitet policore relevante patrulluese, hetues nga Stacioni Policor Ranillug, hetues rajonal duke përfshirë Krim Teknikën Rajonale dhe Njësia për trajtimin e mjeteve eksplozive i janë përgjigjur rastit”, tha ai.Hashani shtoi tutje se nga vendi i ngjarjes është raportuar se nga ky rast lëndime trupore nuk ka pësuar askush përpos disa dëmeve të vogla materiale.

“Pronari i lokalit nuk është takuar nga policia pasi i njëjti për momentin gjendet në pushime jashtë Republikës së Kosovës”, bëri të ditur Hashani.

Rrethanat se si ka ndodhur rasti vazhdojnë të hetohen nga Hetues Rajonal të Policisë në koordinim të plotë me Prokurorinë e Shtetit.​